تورتة الأيس الكريم بالطعم المركز

من الحاجات الشيك جدا اللى ممكن تتقدم للضيوف وتنال الإعجاب والتصقيف الحاد
طبعا الكيكة

بس ب9 بيضات مش 8 و200 جرام سكر و280 جرام دقيق عشان تكون عاليه ....نسبيا
ولله الحمد ماهبطتش وما إدتنيش مقلب زى ما ساعات بيحصل
الظاهر خافت منكم لما عرفت إنكم حتشوفوها ...................

وقطعتها أربع طبقات طبقة واحدة للتورتايه أما التلاته التانيين............................؟!
دوروا عليهم إحتمال تلاقوهم فى آخر الموضوع

ونرجع تانى للأهم
ولحسن الحظ موجودة عندى الصينية ذات القاعدة المتحركة بس للأمانة أنا عملتها قبل كدة من غيرها جبت الصينية العادية وبطنتها كويس بورق الذبدة من القعر ومن الجوانب وبعدين أما جمدت شلتها من الصينية ومن ورق الزبدة وممكن كمان تتعمل بأكياس البلاستيك
حطيت طبقة الكيك

أول طبقة :أيس كريم الفراوله
طبقة أيس كريم الفراوله تم تحضيرها من خلال مضرب البيض واللبن تم إضافته بالتدريج مش مرة واحدة وبكميه أقل من اللى مكتوب عالعلبه لو ضفتيه مرة واحدة ممكن ما يربطش معاكم
وأضفت لون أحمر طبيعى مش باقولكم ....مناظر ههههههههههه
وكمان أضفت صوص فراولة بودرة جاهز كان عندى موجود وبرضه ماركة فيف مينيت
ولتركيز الطعم عملت صوص فراوله
المقادير
فراولة -سكر-جيلى فراوله

الطريقة
-دوبت الجيلى فى حبة ميه دافيه

-ضربت الجيلى والفراولة والسكر فى الخلاط

وعالنار سبتها تتسبك

وفى التلاجة سبتها تسقع

وكان قدامى حاجة من إتنين لإما ألخبطها كلها على الأيس الكريم كله لإما أعملها لونين داخلين فى بعض فاخترت أعملها كدة
حطيت طبقة آيس كريم الفراولة

وبعدين حطيت الصوص المركز

سيبته فى الفريزر يجمد


ثانى طبقة:أيس كريم الشيكولاته على مانجو ولتركيز طعم الشيكولاتة عملت جناش شيكولاتة
يعنى كريمة شكولاته مركزة

المقادير
- حوالى ثمن كيلو قشطة أو أقل قليلا
- ربع كيلو شيكولاتة خام
- علبه صوص شيكولاتة فيف مينيت جاهزة
- كوبايه إلا ربع لبن
-معلقتين عسل نحل أو جلوكوز ودة بيدى لمعة للصوص

الطريقة
- سخنت اللبن وأضفت صوص الشيكولاتة البودرة

واللبن سخن جدا أضفت قطعة الشيكولاتة والقشطة وقلبت كويس كله بيسيح ويختلط مع بعض

وبعدين أضفت العسل ...وخلاص وسيبتها تبرد



أما المانجو فضربتها بالميه الساقعة بدل اللبن لعدم وجود مانجو فى الوقت الحالى بس طبعا لو كانت موجودة كنت إتصرفت ....ماكنتش حاغلب

وحطيت طبقة آيس كريم الشيكولاتة والمانجو على طبقة الفراوله بعد ما جمدت

وحطيت كريمة الشيكولاتة المركزة


وأسيبه فى الفريزر يجمد

ثالث طبقة :أيس كريم الفستق
ولتركيز الطعم عملت حاجة بسيطة جدا.............. إشتريت فستق هههههههه

كيس صغير كدة طحنته طحن خشن خلطت نصفه على الأيس كريم والجزء التانى رشيته عالوش
وعلى فكرة المكسرات ما بتجمدش فى الفريزر ودى ملحوظة مهمة جدا يعنى ممكن تحطى أى نوع من المكسرات فى الأيس الكريم وتجمديه وتاكليه وتستمتعى بيه عكس الفاكهة اللى بتجمد وبتكون عاملة زى الحجر يعنى ما ينفعش تتجمد داخل الأيس كريم لازم تحطيها كطعم مركز مش قطع
وحطيت طبقة آيس كريم الفستق

وسيبته يجمد

وآدى النتيجة النهائية

وصورة عن قريب